Nagpahimatngon hi US President Donald Trump nga tatargeton han Estados Unidos an mga planta han kuryente ngan tulay ha Iran buwas, Martes nga adlaw kun diri hini aabrehan an Strait of Hormuz.
Ha usa nga online post, gin malatumat ni Trump nga mahihimugso an dungan nga pag-atake ha mga importante nga imprastraktura han Iran.
Samtang, igin insistir ni Trump nga nagpapabilin sarado an mao nga agianan mahuman an subra usa ka bulan nga tensyon ngan mga pag-atake han US ngan Israel.
Nagpahimatngon gihapon an US President nga maatubang ha mabug-at nga sirot an Iran kun diri in magi-os.
Ha lain nga bahin, gin baribaran han Iran an suhestyon han Estados Unidos nga 45-day ceasefire.
Igin pahayag han Iran nga an kinahanglan hini in usa nga bug-os ngan sigurado nga pagtatapos han gyera.
Kadungan hini, ginpagawas han Iran an listahan han mga kundisyon agud makuha an kamurayawan. Kalakip hini an madagmit nga pag-undang han mga away ha bug-os nga rehiyon, paghihimo hin mekanismo basi masiguro an talwas nga pagbeyahe han mga barko ha Strait of Hormuz, ngan an pagtanggal han mga igin isa nga sirot o sanctions kontra ha nasud.
Ha luyo nga bahin, igin pahayag ni US Pres. Donald Trump nga magka-iba nga iristuryahon an igin-mugo nga 45-days ceasfire kumo usa nga importante nga pitad agud mapaubos an tension ha rehiyon.
Ha butnga han magkakaiba nga pitad nan pamahayag tikang ha iba-iba nga kampo, nagapabilin nga diri sigurado an direksyon han sitwasyon, samtang nagpadayon an mga paningkamot nga malikayan an mas haluag pa nga gyera ha Middle East.
