Igin mando ni Tanzanian President Samia Suluhu Hassan yana nga Hwebes (adlaw ha Pilipinas) nga an ngatanan han opisyal han gobyerno in mabiyahe nala ha uusa nga bus ha ira official travel agud maibanan an konsumo han gasolina, kasunod han kakulangan hin suplay ha lana, resulta han kasamok ha Middle East.
Subay ha energy regulator han nasud, humitaas an presyo han gasolina hin haros 1/3 tikang hadton bulan han Marso.
Nahibaruan nga kaurugan, an entourage han presidente in ginbubug-os hin sobra 30 nga sarakyan, kaupod an mga luxury SUVs ngan police outriders, ngan kaurugan nagdudurot hin matindi nga trapiko.
“From now on, wherever I go, all officials will travel together in one bus… to cut fuel consumption,” sumala kan Hassan.
Manunumduman nga an kakulangan ha lana in durot han pagsasarado han Strait of Hormuz han Iran, kun diin naagi an 20% han lana ngan gas ha bug-os nga kalibutan.
Resulta hini, pira nga nasud, kaupod an Ethiopa, in nagpatuman na gihapon hin prayoridad ha paghahatag hin gasolina ha mga sarakyan nga nagdadara hin importante nga kalakal ngan pampubliko nga transportasyon.
