TACLOBAN CITY– Ginpaangbit han grupo hiton Tacloban Marasbaras Drivers Operators Transport Cooperative, an ira opinyon kasumpay ha mga bag-o nga rota nga ginpapatuman hiton Local Public Transport Route Plan o LPTRP.
Sumala kan Leo Templado, BOD/ Vice Chairman Tacloban Marasbaras Drivers Operators Transport Cooperative, waray man hira mahihimo ha mga ginpapatuman nga mga aludayday ha pampasaheros nga sarakyan.
Dugang pa ni Templado, ha pagkayana mayda hira 130 nga mga para Marasbaras nga sarakyan an nabiyahe, ngan mayda naman an mga ine hin 150 nga mga drivers ha ira kooperatiba.
Ha pagkayana, waray hira mahihimo kundi magsunod ha ginpapatuman nga rota han LPTRP, matungod nga ine an ginpapatamakan nga mga aludayday, agud nga magkamayda hin hapsay nga dalagan hiton trapiko.
Ginlalauman naman han nasabi nga opisyal, nga posible nga ma-apektaran an mga commuters ha bag-o nga ginpapatuman nga Local Public Transport Route Plan.
