TACLOBAN CITY – Nakapaghipatik an Tacloban City Hospital hin maabot 12 nga kaso hiton dengue ha siyudad kun diin, presente nga naka-admit an mga naduktan nga mga indibidwal ha mao naman nga ospital.
Sumala kan Rhodora Pongos, Nurse Supervisor han Tacloban City Hospital nga nagtikang hira makakarawat hin pasyente nga gin-admit tungod hiton dengue dida han pagtikang han bulan han Agosto.
Dugang pa ni Pongos nga mga residente han siyudad an mga presente nga naadmit nga mga pasyente ngan tikang an mga ini ha barangay 25, 62-A, 91, 62, 97, 71, 104, 55-A, 77, ngan 81 kun diin, ginkikita nga hitaas iton “risk” han mga ini ha dengue.
Ginpahimatngunan naman hini an molupyo nga kun may-ada kamo mga sintomas nga ginaabat nga alagid-agid hiton sintomas kanan dengue, nga dayon magpa-konsulta ha hirani nga mga ospital o health centers agud matambal ini.
Samtang, ginpaangbit gihapon ni Pongos nga bisan gutiay pala iton kaso han dengue ha siyudad nga dire magin kampante iton molupyo ngan pamag-hirot kontra hiton mao nga sakit.
