TACLOBAN CITY — Gin-amin han Department of Education (DEPED) Tacloban City Division nga kinahanglan pa pahuruhuguton an mga reading intervention program han division kasunod han resulta han Comprehensive Rapid Literacy Assessment (CRLA), nga nagpakita nga damo pa nga mga estudyante an magluya o dire pa nakakabasa.
Subay kan Dr. Nilo Eder, Information Office, Tacloban City DepEd Division, waray “sugarcoating” ha datos matungod nga importante makit-an an tinuod nga kamutangan han mga estudyante agud masolusyunan an problema.
Kasumpay hine, gin-mando han Schools Division Superintendent nga pahuruhuguton an mga intervention ngan regular nga panginanuon kun epektibo an mga ine.
Lakip ha mga programa an institutionalized reading program nga ARAL ngan mga summer reading activities kabulig an Department of Social Welfare and Development (DSWD) ngan mga volunteer tutors.
Ha kaluyo han mga ayat, ginpahayag han opisyal nga may mga nahipatik nga improvement, diin maabot ha 6,000 nga mga estudyante an nag- improve an reading level ngan nakagawas na ha intervention program.
Padayon naman an reassessment agud masigurado kun epektibo ang mga programa ngan kun kinahanglanon pa magdugang hin mga pitad agud mabuligam an mga estudyante.
Manunumduman nga lakip ha may pinaka-damo nga struggling readers an Northern Samar Division nga may 52.69%, sinusundan han Catbalogan City Division nga may-ada 50.87%, samtang an Tacloban City in may-ada 49.95% nga mga estudyante nga nakakaeksperyensya hin kakurian ha pagbasa.
