TACLOBAN CITY– Ginkumpirma han Tabon Tabon Municipal Police Station, nga naka-karawat hira hin report tikang ha 5 nga barangay kapitan, nga nagpa blotter ha ira buhatan kasumpay han mga nakarawat hine nga pananarhog.
Sumala kan PCpt. Steve John Abasolo, Acting Chief of Police, Tabon-Tabon Municipal Police Station, nga subay ha ira pagpakiana, an 5 nga Kapitan in nakadto ha Ormoc City ngan mayda gin-aatinderan nga seminar, han maka-karawat hira hin tawag tikang ha usa nga indibidwal, nga nag-aaro hin maabot P100K, kabalyu han ira kinabuhi.
Dugang pa ni Abasolo, nga an nasabi nga indibidwal in nagpakilala ha ira nga usa nga gin-aaligar miyembro han CPP-NPA.
Una hine, han nakalabay nga bulan han Pebrero naka-karawat na gihapon hin kaparehos nga report an nasabi nga buhatan, tikang ha usa pa nga kapitan nga naka-karawat hin panarhog tikang ha gin-aaligar nga mga miyembro han CPP-NPA, ngan nag-aaro hin salapi.
Gintagan duon hine, nga an Tabon Tabon in insurgency free na tikang ha mga hulga hiton walhon nga grupo.
Ginklaro naman ni Abasolo, nga waray kanit hiton pamumulitika an nasabi nga panhitabo, lugod in usa la ine nga panarhog ha nasabi nga mga opisyal hiton barangay.
Naghatag naman hin suhestyon an nasabi nga police official, ha mga barangay kapitan, ngan publiko han Tabon Tabon, nga dire tagan hin panahon ngan oras an sugad nga panhitabo, lugod in dayon nga ig-block an numero, agud nga dire na ine maka perwesyo ha ira.
