TACLOBAN CITY – Ginkumpirma han Tacloban City Government ngan han Department of Agriculture (DA) nga nasulod na an syudad han African Swine Fever.
Ini in mahuman an confirmatory laboratory result han blood samples nga ginkolekta ha mga namatay nga baboy ha Brgy. 84 San Jose Tacloban kun diin gumawas an resulta nga positibo an mga ini ha ASF.
Sumala kan Dexter Bahin, kapitan han Brgy. 84 San Jose Tacloban City, gin-aalegar nga rason han pakasulod han ASF ha ira barangay in tungod han usa nga vaccinator o veterinarian nga nanbakuna hin mga baboy ha iba nga lugar ngan naging carrier na han virus.
Maabot naman ha 17 nga mga panimalay nga sakob han 500 meter radius an apektado hini.
Nanawagan naman ini ha mga tag-ada hin mga baboy ha ira barangay nga igbaligya o ihawon nala an ira mga baboy samtang dire pa an mga ini apektado han ASF.
Nagpahimatngon gihapon an mao nga opisyal ha publiko nga dayon igdangop ha mga otoridad kun ingkaso nga may maobserbahan nga urusahon nga pagkamatay hin mga baboy.
