TACLOBAN CITY – Ginpahayag han Provincial Government han Leyte nga ha pagkayana in waray pa pagbabag-o ha ginpapatuman nga mga protocols para han mga locally stranded individuals (LSIs) ngan returning Overseas Filipino workers (OFWs) nga nangunguli ha probinsya.
Ini in ha kaluyo han ginpagawas nga kamanduan han National Inter-Agency Task Force bahin han uniformed protocols nga kinahanglan igpatuman han mga LGUs kun diin dire na kinahanglan nga magpailarom ha quarantine ngan dire na mandatory an RT PCR swab test han mga LSIs labot nala kun may mga sintomas nga inaabat an mga ini.
Sumala kan Dr. Lesmes Lumen, Leyte Provincial Medical Consultant, nagkaada na hin meeting an provincial IATF bahin hini ngan ginproproseso na gihapon an pagsunod ha mao nga kamanduan han national IATF.
San-o igpatuman an panibag-o nga mga protocols, in kinahanglan anay nga ma-aamyendahan an provincial ordinance ha mga LGUs bahin han swabbing ngan quarantine protocols.
Ginlalauman naman nga ha sakob hin usa kasemana in magpapagawas na hin Executive order o resolusyon an provincial governor han Leyte para han igpapatuman nga mga panibag-o nga protocols.
Samtang waray pa an mao nga kamanduan tikang ha gobernnador in kinahanglan la gihapon nga sundon han mga mangunguli nga LSI ngan OFWs an mandatory swab testing ngan quarantine.
Nahibaruan nga ha pagkayana in maabot na ha sobra 5,200 an COVID-19 confirmed cases ha bug-os nga probinsya han Leyte ngan sobra 1000 naman an nagpapabilin nga active cases.
