Nasikmit ni John Reyl Diano han Eastern Visayas Golden Stingers an siyahan nga Gold Medal ha 100 meters Paralympics dash run ha nagpapadayon nga Palarong Pambansa 2026 ha Agusan del Sur.
Ha ekslusibo nga pakipaghimangraw han Bombo Radyo Philippines kan Diano, ginmalatumat hini nga duro an iya kalipayon nga nadaogan niya an siyahan nga bulawan nga medalya para han Sinirangan Bisayas.
Ha kaluyo han iya intellectual disability, ginpakita ni Diano nga dire usa nga balaong an iya kapansanan agud makab-ot an iya pangarap ngan ambisyon nga magdaog ha nasabi nga paisan-isan.
Sumala naman hini nga gin-aalay niya an iya kalampusan ha Gino-o ngan sugad man ha iya pamilya, coaches, ngan ha mayor han Ormoc City nga hi Hon. Lucy Torres-Gomez.
Hi Diano in usa nga 18-anyos tikang ha Salvacion National High School ngan residente han Brgy. Salvacion, Ormoc City, ngan siyahan nga nakadaog hin gold medal para ha rehiyon ha paralympic category.
