Nakatalaan igselebrar han komunidad han mga Muslim ha Tacloban City an magkadurudilain nga aktibidad kumo kaparte han pagselebrar han Eid’l Adha, usa ha pinaka-importante nga okasyon ha Islam nga nagsisimbolo ha sakripisyo, pag-ampo, ngan pakiki-usa, yana nga adlaw, Mayo 27, 2026.
Sumala kan Brgy. 13 Shopping Center Chairman ngan Tacloban City Muslim Community Vice President, Sultan Esmael Mesug, magtitikang an selebrasyton ha pamamaagi han special prayer o congregational prayer han mga Muslim tikang ha magkadurudilain nga parte han siyudad.
Mahuman an pag-ampo, magbubuhat gihapon an tradisyunal nga pag-aalay o Qurbani, kun diin simbolo ini han pagsunod ngan debosyon kan Allah. An karne tikang naman dinhi in igdedestribwer ha mga nagkikinahanglan, partikular na ha mga kablas nga pamilya ha komunidad.
Kaparte gihapon han selebrasyon an community gathering, kun diin magu-urupod an mga pamilya agud igselebrar an okasyon.
Labot la dinhi, magkakamayda gihapon hin programa pankomunidad nga may panuyuan nga pakusgon an pagkakaurusa dire la han Muslim community kundi pati na gihapon an magkadurudilain nga sektor ha Tacloban City.
Gintagan-duon gihapon ni Mesug an importansya han Eid’l Adha kumo pahimatngun han pagkakaurusa ngan malasakit ha kapwa.
Ginlalauman naman nga damo iton maattender ha nasabi nga selebrasyon, nga gintutudlok nga importante nga parte han kultura ngan pagtoo han mga Muslim ha Tacloban City.
