TACLOBAN CITY – Ginpahayag han pira nga mga meat vendors ha Tacloban nga nakukurian na hira yana pagbiling hin supply hin karne han baboy matungod han natabo nga African Swine Fever (ASF) outbreak ha pira nga mga bungto ha rehiyon.
Sumala ha usa nga paragbaligya hin karne ha Tacloban, makuri na hin duro an ira pamiling hin irihawon nga baboy yana matungod nga kadam-an ha mga munisipalidad in nag strikto na ha pagbabaligya hin baboy ngan an iba naman in may mga confirmed cases na.
Dugang pa niya nga ha yana in ha probinsya han Eastern Samar nala hira nakakapalit hin buhi nga baboy pero ini in limitado la gihapon.
Nagkamay-ada naman hin umento ha presyohan ha baboy ha pagkayana kun diin an kada kilo in ada na ha 300 pesos.
Posible naman nga sumaka pa ini kutob 450 pesos kada kilo kun magpadayon pa an pagkalat han ASF ha pira nga lugar ha Sinirangang Bisayas.
