METRO MANILA – Mas ginpahugot pa han Philippine National Police an pagbabantay han mga Liquified Petroleum Gas (LPG) ha nasud ngan ha pamaligya hini ha merkado kasumpay ha notisya nga posible nala nga mag-iha hin 25 ka-diyas an suplay hini.
Kaupod han kapulisan ha mao nga pitad in an Department of Energy ngan Department of Trade and Industry agud masigurado nga waray negosyante nga mananamantala ha krisis.
Siyahan hini, ginkumpirma mismo ni Energy Sec. Sharon Garin nga nakakaabat na hin kakulangan ha suplay han LPG an Pilipinas.
Ginmanduhan naman an PNP nga tutokan an presyo han LPG, partikular na an mga produkto han lana ha mga tindahan agud masigurado nga nasusunod han mga ini ha mga aludayday nga ginpapagawas han DOE.
Panuyuan hini gihapon in agud makakuha hin insakto nga impormasyon ha ground level kasumpay ha dalagan han baligyaan ngan presyo han LPG ngan direkta nga igsu-sumite ha DTI ngan DOE, ugsa pormal naman nga igsu-sumite ha opisina han Presidente para ha kaangayan nga aksyon han ehekutibo.
