TACLOBAN – Patay an usa nga babaye samtang samaran naman an ka-live in hini nga sundalo ha nahitabo nga pamumusil kakulop nga adlaw, Pebrero 20 ha Purok 7, Brgy. Tarabucan, Oquendo District, Calbayog City, Samar.
Sumala kan P/Col. Andre Dizon, alas 9:00 han kagab-ihon nahitabo an insidente kon diin nakada ha sakob han ira tindahan an mga biktima han may usa nga lalaki nga dumaop haira, nagpakilala nga kostumer ngan diretso hira ginpamumusil.
Ginpuntirya han waray pa kakilal-i nga suspek an biktima nga hi Flora Bonayog, 36 anyos, kon diin damo nga igo hin bala an naangkon hini hinungdan han dayon niya nga kamatayon.
Naigo naman ha braso hi Corporal Edgar Lerois, 37 anyos, ngan yana in aada na maupay nga kahimtang ngan nagpapaupay ha Calbayog District.
Hi Lerois in naka-assign ha 43rd Infantry Battalion nga nakabase ha Lope de Vega, Northern Samar.
Ginpahayag pa ni Dizon nga masirom ngan waray CCTV ha lugar kon diin nahitabo an insidente.
Anggulo nga third party ngan trabaho ni Corporal Lerois an ginkikita han mga kapulisan nga motibo han krimen.
Ha pagkayana in padayon pa an imbestigasyon han mga kapulisan hiunong han insidente.
Gin-aaghat naman ni Dizon an mga molopyo han mao nga barangay nga diri mag-alang nga maghatag hin impormasyon para ha ikasosolbar han mao nga kaso.
