TACLOBAN CITY – Nanawagan an mga lider-estudyante han magkaduro-dilain nga organisasyon han UP Tacloban kontra ha korapsyon han pira nga mga opisyales han Department of Public Works and Highways ngan padayon nga red-tagging ha mga aktibista, journalists, ngan iba pa nga sektor.
Subay ha ira, 60% pondo han Flood Control Projects in nahihingada ha kickbacks han mga kontratista, engineer, ngan opisyal han gobyerno.
Imbes nga magamit an pondo ha mga importante nga proyekto sugad han edukasyon, in nauubos an bilyon-bilyon nga pondo mahitungod han korapsyon.
Labot han korapsyon, gin-tagan duon gihapon han mga raliyista an epekto han red tagging ha mga kabataan ngan aktibista.
Subay ha ira in dire na talwas an mga human rights workers, journalists, ngan magin an mga indibidwal ha simbahan nga nananawagan hin kahimyangan nga hustisya.
Lakip gihapon han pangunahon nga panawagan han mga lider-estudyante in an pagbuwag ha National Task Force to End Local Communist Armed Conflict (NTF-ELCAC), nga nagiging kasangkapan ha paninira ha mga estudyante ngan aktibista.
Nanawagan naman an mga ini kan Presidente Ferdinand “Bongbong” Marcos Jr. nga seryosohon iton imbestigasyon ha flood control anomalies.
Dire daw sakto an mga patapod ngan retorika. Kinahanglanon na hin konkreto nga aksyon ngan papagbatunon an mga korap nga opisyal.
Ginsigurado gihapon han mga lider-estudyante nga nagpapadayon an ira paggios agud nga igduso an mas makabuluhan nga paggamit han pondo han nasud labi na para ha edukasyon, kalusugan ngan iba pa nga serbisyo-pankumunidad. (via Bombo Shiela Encio)
