Posible nga humitaas an presyo han bugas ha nasud ngan umabot ha P60 ngada ha P62 kada kilo pag-abot han Setyembre, sumala kan Agriculture Secretary Francis Tiu Laurel Jr.
Ha pagdungog han Senate Proactive Response and Oversight for Timely and Effective Crisis Strategy (PROTECT) Committee, ginmalatumat ni Laurel nga an ginlalauman nga paghitaas in durot han pagmahal han abono, nga haros domoble na an presyo tikang ha P1,650 kutob P3,000.
Igin eksplikar hini nga kun magpapadayon an mga parag-uma ha tradisyunal nga paggamit han urea ngan dire mabalhin ha fertilizers nga iginrerekomenda han Department of Agriculture (DA), mas mahitaas an gastos ha produksyon nga magreresulta ha mas hitaas nga presyo han bugas.
Dugang pa han sekretarya, gin aadman na han DA an pira nga pitad agud mapugngan an paghitaas han presyo, kaupod na an pagpapatuman han “rice blend” ngan “corn blend.”
An rice blend in ginhalo nga imported ngan lokal nga bugas, sugad han 70:30 o 60:40 ratio, agud mapabilin an suplay ngan makabulig ha mga parag-uma.
Samtang, an corn blend naman in kombinasyon han busag nga mais ngan bugas ha 50:50 nga proporsyon kumo alternatibo nga pagkaon.
Padasyon naman an pamiling han gobyerno hin mas paagi agud mapabilin nga abot-kaya an presyo han bugas ha butnga han naghihinitas nga gastos ha produksyon.
