WASHINGTON D.C., USA – Ginbida ni US President Donald Trump an iya mga nahimo ha sakob han usa ka-tuig, partikular ha ekonomiya ngan seguridad han nasud.
Sumala kan Trump, napahamubo han iya administrasyon an core inflation ha pinakahamubo nga lebel ha sobra lima ka-tuig.
Utro nga ginmalatumat niya nga hi anay US President Joe Biden, nga sumala kan Trump, gintagan an Amerika hin pinakamalain nga inflation ha kasaysayan han nasud, nga taliwas naman sumala ha mga kritiko hini.
Kasumpay hini ginmalatumat gihapon ni Trump an pagribhong han stock market, nga nakaghipatik hin 53 “all-time record high” tikang han magdaog hiya kumo Presidente.
Ginmalatumat gihapon niya nga nakapag-aghat an iya administrasyon hin sobra $18 trillion investments ha siyahan nga tuig han iya pagmangulo.
Ha immigtation nga urusturyahon, nakagpugong an Trump administration hin illegal immigrants ngan pagpasulod hin illegal fentanyl nga usa nga klase nga painkiller ha Amerika nga humamubo hin 56% ngan nahipatik an pinakahamubo nga ihap han illegal immigrants ha border han US-Mexico dida han nakalabay nga tuig.
Samtang, ginbida pa ni Trump ha iya pulong an kakusog han militar ngan kapulisan han Amerika, ngan ginmalatumat, nahadlok na an mga naruruyag nga ayaton an nasud nga nag-ugat ha utro nga pag-respeto han mga ini ha Estados Unidos.
