Nagin istoryahan ha social media an usa nga 74-anyos nga lola nga nagngangaran hin Yingzi, nga nakakuha hin sobra 2 million followers mahitungod ha iya dire nalalagas nga hitsura, fashion sense, ngan mga video han iya pagsayaw ha kalsada samtang nakasul-ot hin high heels.
Kumo pamatuod nga an edad in numero la, iginpaangbit ni Yingzi nga an sekreto han iya kabataan in dire mga marahalon nga makeup ngan skincare products, kundi an pagkakamay-ada hin kumpyansa ha kalugaringon ngan positibo nga panlantaw ha kinabuhi.
Sugadman, ha luyo han mahusay nga panul-utan, in usa nga disiplinado nga panginabuhi. Mahugot nga ginlilikayan hini an pagkaon paglabay han alas-5 han kulop. Mas ginpipili niya an diet nga mas damo an sabaw, green vegetables, ngan protina kumpara ha carbohydrates, ngan gintitikangan niya an kada adlaw pinaagi han usa kaoras nga yoga.
Bata pala in mahilig na hi Yingzi ha pagpapahusay ngan fashion, ginugol niya an iya kabataan ha pagtatrabaho kumo manager han usa nga kindegarten ugsa bumalhin ha Japan dida han dekada ’80 agud magtrabaho ha usa nga kaunan.
Tuig 2022, ha edad nga 70, nagin membro hiya han “Beijing Fashion Grandmas”, usa nga eksklusibo nga grupo han mga modelo nga mayda edad nga 65 paigbaw. Dinhi in natuman an iya hingyap nga makarampa nga hiya an modelo ha Shanghai Disneyland.
