Iginduon han Iran dida han Biyernes nga waray pa ini “final decisions” ha usa nga posible nga kasabutan nga may panuyo nga undangan an tensyon ha Middle East, ha kaluyo han pahayag ni US President Donald Trump nga posible mapirmahan an usa nga deal ha sulod han pira kaadlaw.
Pero maduon nga igindiwara han Iran an ideya nga human na an istoryahon.
Subay ha tagapahyakan han Iranian foreign ministry nga hi Esmaeil Baqaei, wasray pa hira desisyon ha anuman nga kasabutan. Dugang pa, bisan man kun mayda mga parte han teksto nga napagsabutan na, napakyas ini mahitungod ha bag-o nga kondisyon nga iginlatag han Estados Unidos.
Ginmalatumat pa han Iranian state media, dire basta tumuod ha mga pahayag ni Trump samtang dire pa ini ginkukumpirma han Tehran.
Ha butnga han magkakaiba nga pahayag, ginmalatumat gihapon ni Trump nga naipaabot ngan naaprubahan na daw an mga detalye han kasabutan ha pinakahitaas nga liderato han Iran pati na gihapon ha mga kaalyado ha rehiyon, kaupod an Israel.
Subay naman ha Israel, nakig-istorya na hi Israeli Prime Minister Benjamin Netanyahu kan Trump, kun diin ginhingadayan an posible nga kasabutan nga magtatanggal han nuclear materials han Iran ngan magruruba ha missile capabilities hini.
Samtang, padayon naman an pahimatngon han Iran kasumpay ha posible nga epekto ha global economy, labi na ha seguridad han Strait of Hormuz, nga usa ha pinakaimportante nga ruta han lana ngan gas ha kalibutan.
