Ginpapabilin han World Bank an panginano hini nga maursa an ekonomiya han Pilipinas ha 3.7% yana nga 2026 ngan 5.6% ha 2027 ha kaluyo han epekto han nagpapadayon nga kasamok ha Middle East. Sugadman, an forecast para ha presente nga tuig in mas hamubo ha 4.4% nga pag-ursa dida han 2025, ngan waray gihapon umabot ha lima ngada ha unom kaporsyento nga target han gobyerno.
Sumala ha World Bank, ginlalauman nga makakabawi an public investment han nasud mahuman an paghinay han paggastos han gobyerno kasunod han mga isyu han korapsyon ha pira nga flood control projects.
Syahan na gihapon nga nahipatik han Pilipinas an 2.8% nga pag-ursa ha syahan nga quarter han tuig, an pinakamahinay nga performance ha nakalabay nga lima katuig.
Ha East Asia ngan Pacific region, ginlalauman nga mahinay an pag-ursa han ekonomiya ha 4.2% yana nga tuig mahitungod ha epekto han kasamok ha Middle East. Bisan man kun ginlalauman nga masuporta ha pag-ursa han rehiyon an padayon nga paghitaas han electronics exports, mas maapektaran an mga nasud nga nag-aangkat hin enerhiya tikang ha nasabi nga rehiyon.
Ha kalibutan nga lebel, ginlalauman han World Bank nga mahinay an global growth ha 2.5% yana nga tuig tikang ha 2.9% dida han nakalabay nga tuig mahitungod ha hitaas nga presyo han enerhiya, inflation, ngan mas mahal nga pangungutang.
Kumo baton, nakaandam an World Bank nga mag-alutaga hin kutob $100 bilyon nga suporta ha mga nasud nga maaapektaran han nagpapadayon nga kasamok.
