Sobra 5,600 nga tripulante nga Pilipino an nagpapabilin nga stranded sakay han ginatos-gatos nga commercial ngan cruise vessels ha Persian Gulf ngan Gulf of Oman mahitungod ha padayon nga pagkadelatar han maritime traffic resulta han mga hulga ha seguridad nga may paghisumpay ha nagtitikaduro nga tensyon ha butnga han Estados Unidos, Israeal, ngan Iran harani ha Strait of Hormuz.
Ha usa nga pahayag, ginmalatumat han Department of Migrant Workers (DMW) nga kaupod an mga Pilipino ha ginbabana-bana 20,000 international seafarers nga naapektaran han mga operational restrictions.
Subay ha ahensya, naibakwit na nia an ada ha 1,100 nga tripulante tikang ha Persian Gulf pinaagi han coordinating operations nga gindumara kasugbong an magkadiru-dilain nga commercial vessels ngan cruise ships.
Padayon naman nga ginmo-monitor han DMW an mga barko nga mayda sakay nga Pilipino agud masigurado nga mayda hira suprisyente nga pagkaon, inumon nga tubig, medisina, ngan iba pa nga pangunahon nga panginahanglan.
Ginmanduhan gihapon an mga licensed manning agencies nga regular nga maghatag hin update kasumpay ha kabutang han mga marino nga siguraduhon nga mayda suprisyente nga suplay samtang nagpapabilin ha dagat.
