NATIONAL – Ginsigurado ni House Speaker Martin Romualdez nga pag-aalutagaan hin pondo han Kongreso an mga pagtutukuron nga clinic nationwide para ha mga beterano nga usa ha mga prayoridad ni Presidente Ferdinand Marcos Jr.
Ginmalatumat ni Speaker Romualdez nga suportado han House of Representatives an nasabi nga pitad han Presidente nga may panuyo nga pahaluagon an access ha healthcare services han mga beterano nga nag-uukoy ha gawas han Metro Manila.
An pahayag ni Speaker in kahuman han paglulunsar ni Presidente Marcos ha Veterans Access to Lifetime Optimized Healthcare (Valor) Clinic ha Fernando Air Base ha Lipa City, Batangas.
An nasabi nga proyekto in kaparte han programa ha Veterans Memorial Medical Center (VMMC), kun diin an Valor Clinic in gin desinyo para matagan hin primary healthcare services an mga beterano, retirado nga sundalo, ngan ira mga pamilya.
Mahitungod hine, nagpatapod hi Speaker Romualdez nga an nasabi nga mga inisyatibo para ha kapakan han mga beterano ngan retirees in iya sisiguraduhon nga magkakamay-ada ine hin pondo ha ilarom han annual General Appropriations Act.
