TACLOBAN CITY-Nagdeklara na hin State of Calamity an bug-os nga Southern Leyte, matungod ha dako nga danyos nga ginbayaan ni bagyong Tino.
Sumala kan Southern Leyte, Governor Damian Mercado, damo nga mga bungto an apektado han nasabi nga bagyo, partikular na an bungto han Silago Southern Leyte, ngan mga kahagrani hine nga bungto kun diin naglandfall an bagyong Tino.
Dugang pa hine nga nakaghipatik hira hin 1 nga casualty, ngan 2 an nawawara ha kasagsagan han bagyong Tino.
Aminado naman ine nga nakukurian hira maidistribwer han naka pre-position na nga mga ayuda, matungod nga kinahanglan pa nga limpyuhan an karsada agud nga maka-agi an sarakyan ngan maideliver an hinabang.
Ha pagkayana, nagkikinahanglan hira hin mga kadungan nga tawo nga mabulig ha clearing operation, ngan mga kadugangan gihapon nga pagkaon ngan malimpyo nga maiinom nga tubig para ha mga evacuees.
Ginlalauman naman hine yana nga adlaw nga mahuman na an clearing operation ha National Highway pakadto ha Silago, agud nga maipanhatag na an relief goods ha mga apektado nga residente.
Mababaruan nga nag landfall hi bagyong Tino ha mga lugar sugad hiton; Southern Leyte, Cebu, Negros Occidental, Guimaras, ngan Iloilo.
via | Bombo Juvelyn Rancodo
