INTERNATIONAL – Gin-anunsyo han mga otoridad han South Korea ha tanan nga mga paluparan ha nasud nga kinahanglan mag-install hin bird detection cameras ngan radars kumo kabatunan han Jeju Air crash nga nakaawat hin kinabuhi han 179 nga mga pasahero.
Manunumduman nga an Boeing 737-800 in tikang ha Thailand ngan tipakadto ha Muan airport ha South Korea han maglaprak ine dida han Disyembre 29, 2024.
Kumo kabatunan han makasaysayan nga trahedya han nasud, naglunsar an gobyerno han South Korea hin usa nga pitad agud mapabilin an seguridad han mga pasahero ngan siguruhon nga tanan han mga paluparan in magkakaada hin durudamo nga thermal imaging camera komo kaparte han ira pagdudumaraon nga inspeksyon.
Kasumpay hine, target gihapon han gobyerno han South Korea nga magkaada hin mga mobile sonic devices agud mahibaruan an kadako han mga tamsi samtang an mga bird detection radars in igbubutang naman ha mga paluparan.
An nasabi nga radars in amo an magmomonitor han kiwa han mga tamsi ngan igpapadara an impormasyon ha mga air traffic controllers nga amo iton makikipag-sumpayan ha mga piloto agud matudlok ngan dayon maresolbar an problema.
Subay ha imbestigasyon, nahibaruan ngan an hinungdan han paglaprak han nasabi nga eroplano in matungod han mga barahibo han tamsi ha pareho makina han Jeju Air flight.
