Usa nga ultimate fan han Marvel movies an nakaghipatik hin Guinness World Record para ha titulo nga “Most Marvel comic book characters tattooed on the body” mahuman ini umabot ha nakakabilib nga ihap nga 63.
Gin perdi han 40-anyos nga hi Tom Radford an anay record nga 34 tattoos nga kapot nira Ryan Logsdon han US ngan Rick Scolamiero han Canada. Sumala kan Radford, nagtikang an iya matindi nga pagkaruyag ha pagpapa-tattoo han Marvel characters dida han 2016 han iga-tattoo niya an supervillain nga hi Thanos ha iya hita. Ugsa ini, mayda na hiya simple nga text tattoo dida han 2007 nga “With great power comes great responsibility.”
Kun pag-uurusahon an oras nga iya gin gamit ha pagpapa-tattoo han mga Marvel characters, ginbabana-bana nga maabot ba 350 hours o sobra duha nga bug-os nga semana. Gumastos gihapon hiya hin sobra-kulang £18,000 (1.4 million pesos) para ha kabug-usan han iya mga tattoo.
Nagin kaparte hihapon han iya body art an pagkikita nira han mga aktor nga hira Josh Brolin (Thanos) ngan Elizabeth Olsen (Scarlet Witch) ha usa nga Comic-Con event dida han 2024, kun diin iginpatattoo gihapon niya mismo an ira mga autogtaph o pirma. Ginbuhat gihapon ini ni Radford kumo regalo ha kalugaringon para ha iya 40th birthday.
Sumala kan Radford, andam hiya dugngan pa ini ha masunod nga tuig agud mas ighitaas pa an standard han nasabi nga world record.
