Igintudlok ni Finance Sec. Frederick Go an Business Process Outsourcing (BPO), semiconductor ngan electronics manufacturing, ngan renewable energy kumo mga sektor nga madagmit umursa ngan makapaghatag hin mas damo nga trabaho ha mga Pilipino.
Ha iya pahayag ha IMF-World Bank Spring Meetings 2026, ginmalatumat ni Go nga padayon nga nagtitikahaluag an BPO industry ha nasud, nga yana in nakapukos na gihapon ha artificial intelligence, data analytics, ngan IT-enabled services. Sumal kan Felipe Jaramillo, Vice President for Asia and Pacific han World Bank, kinahanglan sundon han East Asia Pacific an Pilipinas ha pagbalhin ha mas high-value services.
Ginmalatumat gihapon ni Go nga an nagtitikado nga semiconductor ngan electronics sector, kun diin mga kumpanya sugad han Samsung in nagdudugang hin investments ngan trabaho. Kadungan hini, nakusog gihapon an renewable energy projects ha nasud kaupod an wind, solar, ngan geothermal energy. “Our weakness is our strength,” sumala kan Go, nga natudlok ha agsub nga bagyo, duro nga sirak han adlaw, ngan aktibo nga bulkan ha nadud nga pwede himuon nga oportunidad para ha enerhiya.
Agud mapabilin an job creation, iginduduso han gobyerno an mga reporma sugad han CREATE MORE Act ngan Public-Private Partnership Code, nga naghahatag hin long-term incentives ngan nagpapakusog han investor confidence.
Dugang pa ni Go, dako gihapon an puhunan han gobyerno ha education ngan skills training agud masigurado nga andam an mga Pilipino ha panginahanglan han mga bag-o nga industriya.
Subay ha datos han Philippine Statistics Authority (PSA), umubos ha 2.66 milyon an ihap han unemployed Filipinos dida han Pebrero 2026 tikang ha 2.96 milyon dida han Enero.
Sugadman, mas hitaas la gihapon ini kumpara ha 1,94 milyon dida han Pebrero 2025, mahitungod nga ma damo nga tawo an nagbibiling hin trabaho kumpara ha aktwal nga nakakarawat han labor market.
