METRO MANILA – Ginsigurado han Land Transportation Franchising and Regulatory Board (LTFRB) an mas madagmit ngan padayon nga pandestribwer han fuel subsidy mahuman kumpirmahon nga umabot na ha sobra P651 milyon tikang ha kabug-usan nga P2.5 bilyon an pondo nga naihatag ha mga public utility vehicle (PUV) drivers ngan operators ha bug-os nga nasud.
Ini an nagin bag-o nga anggulo han ahensya mahuman aminon nga nagkamayda hin pagkadelatar ha siyahan nga parte han panhatag nga nagtikang dida pa han ika-25 han Marso.
Ha usa nga pahayag, ginmadohan ni LTFRB Chairperson Atty. Vigor Mendoza II an tanan han ira regional directors nga siguraduhon an madagmit ngan waray problema nga pan-hatag han cash assistance.
Basar ha datos han ahensya, tikang ha kabug-usan nga P651,185,000 nga naipandestribwer, pinakadako nga pondo an nangadto ha Metro Manila nga nakakarawat hin P181.2 milyon.
Nasunod dinhi an CALABARZON nga may P98.2 milyon, ngan Central Luzon nga nakakuha naman hin P73.4 milyon.
Kumpyansa naman an LTFRB nga mas mapapadagmit na an pagdalagan han programa ha mga masunod nga adlaw agud mabuligan an sektor han transportasyon.
