METRO MANILA – Mahugot nga iginmamando yana han National Police Commission o NAPOLCOM, an pagpapatuman han halawig nga institutional changes agud dayon nga matuldukan an kultura han hazing ha sakob han Philippine National Police Academy o PNPA.
An pitad in direktiba ni NAPOLCOM Chief Commissioner Rafael Calinisan.
Ginmandohan han opisyal hira Commissioner Josephus Angan ngan Commissioner Beatrice Aurora Vega-Cancio nga pangunahan an pagtukod han mga panibag-o nga polisiya ngan epektibo nga mekanismo agud maproteheran an mga kadete kontra ha bisan ano nga klase han tradisyon han pan-aabuso.
Ginklaro han komisyon nga an plano nga paglimpyo ha akademya in usa nga bulag nga inisyatiba tikang ha presente nga ginpro-proseso nga reporma para ha recruitment han mga opisyal ngan non-commissioned officers han PNP.
An dayon nga aksyon han NAPOLCOM in kasundo han panibag-o nga kontrobersya nga ginkakadabihan han PNPA, kun diin sobra 20 nga underclassmen an nabiktima han hazing.
Ginsigurado naman ni Calinisan nga tututukan han komisyon an kaso ngan dire na nira tutugotan nga mautro an sugad nga insidente.
