PALOMPON, LEYTE — Dako nga danyos an ginbilin han usa nga sunog nga naglarab ha usa nga pampubliko nga iskuylahan ha Brgy. San Guillermo, Palompon, Leyte dida han aga han Abril 12, 2026.
Sumala kan Palompon Municipal Fire Station Chief Investigator, SFO1 Daniel Jone Ibajan, nga basar ha ira inisyal nga imbestigasyon, nagtikang an sunog dida han alas 10:49 han aga ha San Guillermo National High School, ngan nagsarang ha magkalain nga parte han iskuylahan.
Gintutuohan nga tikang ha faculty room an sunog kun diin naugbaw han kalayo an duha nga building ha sakob han iskuylahan kaupod na dinhi an computer lab ngan Senior High classroom.
Gin-e-estimar nga maabot ha sobra P850,000 an kantidad han danyos ha mao nga insidente, sumala han initial estimate han Bureau of Fire Protection.
Dida han pakakarawat hin report an buhatan, dayon nga rumesponde an mga bumbero ngan lokal nga otoridad agud mapuy-puy an sunog ngan malikayan an pagsarang pa hini ha iba pa nga parte han iskuylahan. Samtang, waray naman may nahipatik nga nasamaran ha insidente.
Ha pagkayana, padayon an ginbubuhat nga imbestigasyon han mga otoridad agud matudlok an hinungdan han sunog.
Padayon naman nga nanawagan an mga opisyal hin bulig ngan suporta para ha rehabilitasyon han nasunog nga pasilidad agud maibalik ha normal an operayson han iskuylahan.
