TACLOBAN CITY – Narekober han PNP-Highway Patrol Team han Northern Samar an 37 ka-kilo han gin aalegar nga shabu ha Brgy. Jubasan, Allen, Northern Samar.
Ginkilala an mga suspek kanda alyas “Karding”, alyas “Pilo”, ngan alyas “Mirot”.
Subay ha impormasyon, nagdudumara hin anti-carnapping operation ha nasabi nga lugar an RPHU Northern Samar han masita hine an usa nga sarakyan mahitungod han seatbelt violation ngan kapakyas hine nga makag-presentar hin OR/CR.
Ha pagdumara han visual search han mga kapulisan in nahikit-an nga mayda ine sulod nga black package nga kaparehas an pustura han surudlan han droga nga syahan nga nakumpiska dida han naglabay nga Agosto 31 ha kaparehas nga lugar.
Pinaagi han PDEA K9 Unit in narekober an 37 kabug-os nga black packages han gin aalegar nga shabu nga mayda kabug-aton nga 37 kakilos ngan nagkakantidad hin P277,500,000.
Nakapaslak naman na an mga suspek ha presohan nga mag-aatubang an mga ine hin kaso ha pagtalapas han RA 9165 o Comprehensive Dangerous Drugs Act of 2002.
