MACARTHUR, LEYTE – Narekupo han mga otoridad ha gindumara nga joint operation an ginbabaligya nga peke ngan smuggled nga mga sigarliyo ha Brgy. Tin-Awan, MacArthur, Leyte dida han nakalabay nga adlaw, Enero 13.
Durante han operasyon, naaresto an suspek nga ginkilala kan alyas Sansan, 52-anyos, ngan residente han nasabi nga lugar.
Sumala kan MacArthur Municipal Police Station Officer in Charge, PLt. Joseph Falle, naaktuhan an suspek ha akto nga ilegal nga nagbabaligya han peke nga sigarilyo, nga pagtalapas naman ha Sections 263 and 265 of the National Internal Revenue Code (NIRC).
Nakuha gihapon ha suspek an magkaduru-dilain nga klase hin sigarilyo kaupod an 134 reams, usa ka-pack, ngan usa ka-stick hin sigarilyo nga Delta; siyam ka-pack ngan upat ka-stick hin Cannon Menthol 100’s; ngan pito ka-reams, walo ka-pack, ngan sa ka-stick hin sigarilyo nga Modern, ngan mayda kabug-usan nga kantidad nga P225,900.
Ginpahibaro naman an suspek kun ano an iya ginka-aresto ngan han iya mga katungod ha konstitusyon kaupod an ha ilarom han Republic Act 9745 o Anti-Torture Act of 2009.
Gindara an suspek ha MacArthur Municipal Police Station para ha dokumentasyon ngan kaangayan nga disposasyon.
