ORMOC CITY – Arestado ha gindumara nga buy-bust operation an duha nga indibidwal ha Sitio Capangi-an, Brgy. Curva, Ormoc City, dida han nakalabay nga adlaw, kun diin usa hine an Rank 1 ha Regional Priority Target List ha nasabi nga syudad.
Ginkilala an mga suspek kanda alyas Nante, 48-anyos, listado kumo Rank 1 drug personality ha Regional Priority Target List (RPTL), ngan residente han Sitio Capangi-an, Brgy. Curva, Ormoc City; ngan hi alyas Lyn, 30-anyos, listado kumo street-level individual (SLI), ngan residente han Purok 2, Brgy Linao, Ormoc City
Nakuha ha mga suspek an pito ka-sachet han gin aalegar nga shabu nga may-ada kabug-aton nga 332.18 ka-gramos ngan nagkakantidad hin purluminos P2,258,824.
Labot pa hine in narekober gihapon ha mga suspek an usa nga Caliber .45 COLT MK IV pistol nga mayda nakabutang nga magazine ngan tulo nga bala.
Ha pagkayana in aada na ha kustodiya han kapulisan an mga suspek ngan mag-aatubang ha kaso pagtalapas han RA 9165 o Comprehensive Dangerous Drugs Act of 2002.
