TACLOBAN CITY – Ada ha 59 nga panimalay an nahipatik nga naugbaw han sunog, samtang waray pa naman ihap an mga partially burned ha nahitabo nga sunog ha Brgy. 39 Siren Calvary Hill, Tacloban City, kakulop nga adlaw, Pebrero 17.
An balay nga gintikangan han sunog in ginpapanag-iyahan han usa nga ginkilala kan “Mana Letty”.
Sumala kan Tacloban City Bureau of Fire Protection Chief Investigator, SFO2 Anthony Alvin Duran, malaksi nga nagsarang an kalayo mahitungod nga dirigkit an mga panimalay ngan kaurugan in mga himo ha light materials sugad han plywood, lumber, ngan trapal.
Usa pa daw ha nakadugang han pagdako han kalayo in an kamapaso ngan kamahangin han panahon, ngan makuri daw gihapon ma-access an lugar mahitungod nga suluron ine ngan waray makaka-sulod an mga bombero ha lugar mismo.
Agud mapuypoy an kalayo in gindurugtong nala an mga hose han bombero tikadto han lugar ngan nag-bayanihan gihapon an mga residente gamit an balde-balde nga tubig.
Samtang, nahi-isa naman an sunog ha ikaduha nga alarma, sanglit nagresponde gihapon an mga fire stations han Palo, Tanauan, Sta. Fe, ngan Pastrana.
Ada naman ha P3 million an inisyal nga estimated damage nga ginbayaan han nasabi nga sunog.
Temporaryo naman nga nagpalipas hin gab-i an pira han mga nasunogan ha tent nga gin-assemble han mga opisyal ha barangay, kun diin naghatag gihapon hin evacuation area an City Government han Tacloban ha may Bypass Road, Abucay.
