TACLOBAN CITY – Nanawagan hi Senator Cynthia Villar ha National Food Authority (NFA) nga pumalit hin humay tikang ha mga parag-uma agud nga malimitahan na an rice smuggling.
Ini ha luyo han kakulangan ha suplay han NFA rice ngan kamahal liwat ha presyo han commercial rice ha mga merkado
Sumala kan Sen.Villar,chairman heton Senate Committee on Food and Agriculture kinahanglan nga maghimo hin inisyatibo an NFA nga pumalit hin bugas ha gawas han Central Luzon.
Nakukurian daw iton NFA nga pumalit hin humay ha 17 pesos kada kilo mahitungod adto hira napalit ha Central Luzon nga hirani ha Metro Manila.
Dapat maniguro daw an NFA nga pumalit hin humay ha iba nga probinsiya sugad nala han Mindoro, Antique, Camarines Sur, North Cotabato,ngan iba pa nga parte han Pilipinas nga mas hibubo an presyo.
Dugang pa hini nga kunta maghimo hin pitad an natura nga ahensiya nga diri igbaligya han mga parag-uma an ira mga humay ha mga negosyante.
Mayda manggud nakakarawat an senadora nga mga reklamo tikang ha mga parag-uma nga dako an tarha han ira humay kon ginbabaligya nira ini ha NFA.
Kunta in diri hini tarhaan hin dako an mga humay nga ginbabaligya ha ira ahensiya, gilngon nala nira ini agud masiguro nga may buffer stock an ahensiya kumo kaparte han ira mandato.
Kon mabubuhat daw ini han NFA, diri la nira mabubuligan an mga parag-uma kundi upod na gihapon an mga konsumidor hin bugas nga namimiling hin mas barubarato nga presyo hin bugas
Mababaruan nga ginsasayop han senadora an NFA ha paghitaas han presyo han bugas ngan rice shortage ha pipira nga parte han Mindanao kon diin humitaas ini hin 80 kada kilo ngan sobra 50 liwat kada kilo ha parte han Sinirangan Bisayas.
Kinahanglan daw nga buhaton han NFA an ira mandato agud nga masiguro an food security ha nasod.
Samtang, gindisabuyunan naman han senadora an proposal ni Agriculture Secretary Emmanuel Piñol nga ig-legalize an rice smuggling mahitungod nga makakaruba ini ha ekonomiya ngan pagtalapas ini han ginpapatuman nga Anti-Agricultural Smuggling Act of 2016.
