NATIONAL NEWS- Ginbuyagyag ni Senator Rodante Marcoleta nga may usa nga kongresista nga nakig-sitorya ha abogado han Discaya para mandamay hin senador para makalikay nga ma- contempt.
Ha sesyon han Senado, ginkumpirma ni Sen Marcoleta nga naka-karawat hiya hin text message tikang ha abogado ni Pacifico “Curlee” Discaya II kun diin mayda daw kongresista nga nakighimangraw daw ha ira nga mandamay hin senador ha kasagsagan han hearing ha House Infrastructure Committee kakulop nga adlaw, September 9 kabalyo nga dire ma-contempt an mga ine.
Dugang pa ni Marcoleta, kapot niya yana an mensahe kumo ebedinsya ngan pamatuod ha iya mga pamahayag.
Gintagan duon han Senador, nga kinahanglan matudlok kun hino an mga indibidwal nga agsob makahimangraw ni Department of Public Works and Highways (DPWH) Undersecretary Maria Catalina Cabral nga daw sindikato ha flood control projects.
Manunumduman, nadabi an ngaran nira Senator Joel Villanueva ngan Sen. Jinggoy Estrada mahuman nga igbuyagyag ni anay DPWH district engineer Brice Ericson Hernandez nga daw naka-karawat hin kickback ha flood control project ha Bulacan, butang naman nga gindiwara han duha nga senador.
