ODD NEWS– Mahitungod nga permi na an pangangawat ha mga beer glass ha mga bar ha Belgium, naging normal na ha mga bar owners didto nga magpatupan hin kun anu-ano nga security measures agud malikyan ini.
Sugad nala han usa nga bar ha Ghent kun diin ginpapahubo nira an sapatos han mga customer ha entrance ngan gintatago anay nira ini kumo collateral pananglitan kawatan hira hin beer glass.
Tikang dida han maging patok ha mga turista han Belgium an Belgian beer, naging pangkaraniwan na ha mga pasaway nga turista nga ig-uli an beer glass kumo souvenir.
Kinada tuig, nawawarayan hin maabot 4,000 baso hi Alex De Vriendt ha iya bar nga Dulle Griet. Nagkakantidad hin 50 euros an kada custom made nga baso ni Alex sanglit dako an nalulugi ha iya.
Sanglit nahuna-hunaan niya nga himuon nga collateral an sapatos han mga customer agud igbalik han mga ini an beer glass mahuman hira uminom.
Sumala kan Alex, naibanan an pangawat hin beer glass ha iya bar pero mayda pipira nga mas pipilion nga umuli nga waray sul-ot nga sapatos para la mayda maiuli nga souvenir.
