Ginpapakusog han City Agriculture Office han Tacloban an partisipasyon han mga kabataan ha agrikultura pinaagi han 4-H Club, nga ginkokonsidera nga importante nga youth arm ha pag-andam han masunod nga henerasyon han mga parag-uma ngan ha pagkab-ot han food security.
Sumala kan Romelo Anade, Head han City Agriculture Office han Tacloban, syahan nga prayoridad han City Government an pag-empower han mga kabataan pinaagi han 4-H Club. An 4-H Club o Head, Heart, Hands, Health in maiha na nga youth arm han Department of Agriculture kun diin diri la dinhi ha Tacloban kundi ha bug-os nga Pilipinas.
Ginpahayag ni Anade nga importante gud nga may-ada youth arm ha agrikultura tungod kay an mga kabataan an magigin masunod nga henerasyon, labi na nga nagtitikalagas na an kadam-an han mga presente nga parag-uma. Usa ini han mga ayat nga ginkakaatubang han ira buhatan ha pagkab-ot han food security, tungod kay kadam-an han mga parag-uma yana an aada na ha edad nga 57 anyos pa-igbaw.
Dugang pa niya, tungod han ira edad ngan mga sakit sugad han rayuma, high blood pressure ngan iba pa, diri na bug-os nga namamaximize han iba nga parag-uma an ira potensyal ha pagproduce hin mas damu nga pagkaon para ha katawhan. Tungod hini, panahon na, sumala kan Anade, nga ig-reactivate ngan ig-empower an mga batan-on, upod an mga young professionals, mga estudyante, out-of-school youth ngan in-school youth, agud magin aktibo nga kaparte han agrikultura.
Natapod naman hi Anade nga kun mamaximize an potensyal han mga kabataan ngan magin hul-os hira nga kaparte han agrikultura, madudugangan an produksyon han pagkaon ngan makakabulig ini ha pagkab-ot han food security. An 4-H Club, sumala haiya, in usa nga importante nga plataporma agud maipreparar an mga kabataan ha pagpadayon ngan pag-ursa han sektor han agrikultura.
