Iginduduso ni House Majority Leader Ferdinand Alexander “Sandro” Marcos han Ilocos Norte an dayun nga pag-abolish ha travel tax kun diin natuod ine nga napapanahon na agud tanggalon ine mahitungod nga nagigin pas-anon ine ha mga Pilipino nga biyahero ngan ha pagbakdaw han ekonomiya.
Iginsalawad ni Marcos an House Bill No. 7443 nga panuyo nga igpawaray-bisa an travel tax nga iginpapahamtang ha ilarom han Presidential Decree No. 1183 ngan han Tourism Act of 2009.
Sumala kan Majority Leader Marcos, an travel tax nga naabot ha P2,700 para ha first class ngan P1,620 para ha economy class in dugang nga gastos nga nagpupugong ha pagkiwa han mga Pilipino nga nabiyahe para ha trabaho, pamilya, ngan iba pa nga oportunidad.
Gintagan-duon niya nga pas-anon ine labi na ha mga pamilya nga Pilipino, ngan mas maupay unta nga magamit an kantidad para ha pangunahon nga panginahanglan ngan lokal nga ekonomiya.
Gintudlok gihapon ni Marcos nga kadam-an ha mga nasud ha ASEAN in gintanggal na an kaparehas nga buwis agud pag-ursahon an turismo ngan trade, sanglit nagigin dehado an Pilipinas ha pagpapabilin hine.
Ha ilarom han panukala, an pondo para ha mga ahensya nga presente nakatatagamtan ha travel tax sugad han TIEZA, CHED, ngan NCCA, in ig aalutaga nala ha General Appropriations Act.
