ODD NEWS – Nahulaan han usa nga turista an sakto nga kombinasyon han usa nga safe o kaha de yero nga 40 ka tuig na nakasara ngan diri maabre-abrehan.
Nahimo ni Stephen Mills nga bisitahun niya an iya pamilya an Vermilion Heritage Museum ha Alberta, Canada diin makikit-an an usa nga safe nga an anay nakada ha Brunswick Hotel nga nagsara dida pa han 1970s.
Gintagaan hi Mills hin higayon nga hulaan an kombinasyon han safe nga diri maabre abrehan bisan pa han mga eksperto ha mga kaha de yero.
Ha una nga testing pala, naabrehan layun ini ini Mills nga waray bisan ano nga eksperyensya ha pag aabre han mga safe.
Gintestinga la daw niya an mga una nga numero ha iya huna-huna nga 20-40-60.
Asya waray naman makatuo an pipira han tigda nga naabrehan an Safe.
Puro mga daan nga tseke, notebook ngan resibo la an sulod han mao nga kaha.
