NATIONAL NEWS– Kalakip hi anay Pangulong Rodrigo Duterte ha mga legal nga tinaglawas han Bise Presidente Sara Duterte ha petisyon nga ginhaon ha Korte Suprema agud nga pugngan an impeachment.
Subay ha kopya han petisyon, kalakip gihapon ha mga abogado ni VP Duterte an iya ugangan nga hi Lucas Carpio Jr. ngan an pira pa nga mga law firm.
Naghaon hin petition for certiorari and prohibition hi VP Duterte hadton Pebrero 18, kalakip an hangyo nga temporary restraining order (TRO) ngan writ of preliminary injunction agud nga pugngan an Senado ha pagdumara hin impeachment trial.
Ginhangyo gihapon ha Korte Suprema nga magpagawas hin pinal nga kamanduhan agud nga igpawaray-kapas an ika-upat nga impeachment complaint nga gin-aprubaran han Kamara hadton Pebrero 5, kun diin 215 nga manbaralaod an pumirma ha reklamo.
An petisyon ni VP Duterte in lain la ha syahan nga petisyon nga ginpasaka han usa nga grupo han mga abogado tikang ha Mindanao han kaparehos nga adlaw.
