ODD NEWS– Usa nga British programmer an nakakabulig yana ha mga katawhan pinaagi han iya ginhimo nga robot nga abogado .
Mababaruan nga naghimo hin website an 19-anyos nga hi Joshua Browder kun diin pwede nga dumaop an mga may problema legal.
Gintikangan ni Browder an iya proyekto han matiketan hiya matungod ha illegal nga parking han iya sarakyan.
Umapela hi Browder ha mao nga parag- tiket ha iya ngan umabot hin pira ka oras an paghimo han mga dokumento para la makalikay ha pagbayad han multa.
Hadto nga takna in naka-huna-huna hiya nga maghimo hin usa nga computer program nga automatic nga mahimo hin mga dokumento para ha mga tawo nga may simple nga problema.
May naka-andan na nga surat para ha pag-apela an robot nga abogado ngan kinahanglan nala hini nga igbutang an mga personal nga detalye han hin-o man nga na nginginahanglan hin bulig ha niya.
Nagin manilampuson naman an syahan nga version han proyekto ni Browder sanglit nga kadugayan in ginpahalawig pa niya an kapasidad hini.
Hapagkayana in pwede na gihapon nga umaro hin bulig ha mao nga robot lawyer an mga problema maypaghisumpay ha insurance ngan paglanat ha mga airline o tren nga palpak an serbisyo.
Mababaruan nga ha kaluyo hini in libre an tanan nga serbisyo sanglit nga ginbabana-bana nga maabot ha $400 kutob ha $900 an natitipid han mga tawo nga nadaop ha mao nga robot lawyer ni Browder.
Sumala pa kan Browder, nga ginhimo niya an mao nga robot lawyer para ha mga tawo nga waray oras ngan kapasidad para pag-adman an solusyon han ira problema legal ngan para malikayan na gihapon han mga tawo an mga abusado nga abogado.
