TACLOBAN CITY – Patay an usa nga retired judge ha Tacloban City mahuman nga sakaon han menor de edad nga suspek ha iya panimalay ha Marasbaras, Tacloban City.
Ginkilala an suspek nga usa nga lalaki, 17-anyos an pangidaron, ngan residente han Brgy. Taguictic, San Jose, Tacloban City.
Sumala kan Tacloban City Police Office Information Officer, PLt.Col. Allan Camasin, nahitabo an krimen dida han gab-i han Nobyembre 23, kun diin dida han nag-aandam an kabulig han biktima para han panihapon in nahikit-an hine an suspek nga gumawas ha usa nga kwarto han balay.
Kun diin, dida han pagpakiana han kabulig ha suspek kun hin-o ine in bumaton daw an suspek nga kilala hiya han biktima.
Pumakadto naman an kabulig ha kwarto han biktima agud kumpirmahon kun tinuod nga kilala hine an suspek, kun diin dida han pakakita han biktima ha suspek in ginkumpirma hine ha kabulig dire niya kilala an suspek.
Durante han nasabi nga panhitabo, tigda nga gin daop han suspek an biktima ngan igin tikwang ine ngan dayun gihapon nga bumunot hin pisaw, kahuman in gintarhog an kabulig nga dire manginlabot agud waray manabo nga maraot haiya.
Dumalagan naman an kabulig pagawas han balay ngan nangaro hin bulig han makabati ine hin kasamok ha sulod han kwarto.
Dida han pagbalik hine kaupod an mga otoridad in nahigda na an biktima ngan dugu-on ngan mayda na mga binun-an.
Gindara pa naman an biktima ha hospital pero gin deklara na ine ng dead-on-arrival.
Samtang, kakulop han maagahon, Nobyembre 25, in naaresto naman han mga otoridad an suspek haira panimalay.
Gin amin naman han suspek an krimen ngan dida han pamakiana pa han imbestigador, igin sumat han suspek nga ugsa an krimen in nakig-inom hiya ha iya kasangkayan ngan gin amin gihapon hine nga gumamit hira hin ilegal nga droga.
Nakadetine naman an suspek ha Police Station 1 para ha kaangayan nga disposasyon.
