TACLOBAN CITY – Nakatalaan nga magsumiter utro hin resolusyon an Eastern Visayas Regional Inter-agency Task force on emerging infectious diseases (RIATF-EID) para ighangyo ha national IATF nga igpailarom ha General Community Quarantine (GCQ) an bug-os nga rehiyon ha sakob hin usa kabulan mahitungod han padayon nga paghitaas han COVID-19 cases.
Una hini, ginkarawat na han IATF an syahan nga resolusyon nga ginsumiter han regional interagency task force para igbalik utro ha GCQ an bug-os nga Sinirangan Bisayas, pero tungod nga dire natugot an IATF nga kinse diyas la an magiging implementasyon hini, naghihimo na ha pagkayana an regional taskforce hin panibag-o nga request para maimplementar an GCQ tikang yana nga Setyembre 1 tubtob Setyembre 30.
Sumala kan Karl Caesar Rimando, Regional Director han Deaprtment of Interior and Local Government (DILG) Regional Office 8, waray naman sadang nga igkabaraka an publiko tungod nga dire naman magiging dako an pagbabag-o ngan epekto han GCQ ha rehiyon.
Ini in para la malimitahan an paglinakat ngan pag-ginawas han mga katawhan ngan matudlok an rason han paghitaas han COVID-19 cases ha rehiyon agud nga makapagbuhat hin kaangayan nga pitad an mga otoridad.
Samtang, nahibaruan nga kaupod gihapon ha resolusyon han regional interagency task force an hangyo nga magkaada hin moratorium ha mga locally stranded individuals (LSI) ha sakob gihapon hin 30 diyas.
