TACLOBAN CITY – Nagin malipayon an reaksyon ni Mayor Lovell Anne Yu-Castro ha nagin kadaugan hiton Tribu Mag-uruma nga nagrepresenta han ira bungto nga Alangalang, Leyte.
Sumala pa hine, maiha nga panahon nga waray nagbagting an lingganay han Tribu Mag-uruma kun diin dida la han nakalabay nga Sabado in ginbati utro ine kun diin ginkilala gihapon ine kumo 1st placer hiton nasabi nga kompetisyon.
An pagbalik gihapon han Tribu Mag-uruma in maikokonsidera nga comeback hiton Lingganay Festival kun diin urhi ine nga nagkampeon dida han urhi nga tuig nga bumulig ine han Kasadyaan Festival.
Dugang pa hine, dire maiha an ira nagin pangandaman para ha nasabi nga kompetisyon mahitungod nga nakakarawat hira han imbitasyon dida la han Mayo ngan nagpost la hira ha social media para naman magbiling han mga interesado nga katawhan nga bumulig han kompetisyon.
Samtang, maabot naman ha 80 nga dancers ngan 170 nga propsmen an bumulig han Pintados Festival Dance Rituals Competion yana nga tuig.
