TACLOBAN CITY – Ginpahuruhugot pa han City Health Office han Tacloban an pagimplementar hiton Peer Reaching Out to Empower Children and Youth of Tacloban o PROTECT agud mabaton an nagtitikahitaas nga kaso hiton mental health issues ha siyudad.
Sumala kan City Health Office Tacloban City, Officer-In-Charge, Dra. Gloria Fabrigas nga kaupod an Department of Health Eastern Visayas CHD, in nagbuhat hira hin konsultasyon ha mga eskwelahan ha siyudad ngan mga representante sugad man nag-train gihapon hira ha mga ini nga magin usa nga peer facilitator para han mao nga programa.
Panuyuan han mga peer facilitators in agud nga makaghimo hin safe-space kun diin, komportable nga makakagyakan an mga kabataan o mga indibidwal ngan makaghatag an mga facilitators hin bulig ngan interbensiyon ha mga kabataan o indibidwal nga nakakaeksperyensiya hin isyu ha mental health.
Dugang pa ni Dra. Fabrigas nga target han mao nga programa iton mga eskwelahan ngan mga Youth organization matungod nga kadam-an mangud nga nakakaeksperyensiya hin mga mental health in an mga kabataan.
Samtang, ginpaangbit gihapon ini nga dire la abri an PROTECT Program para ha mga kabataan pati na gihapon iton mga adult nga nakakaeksperyensiya gihapon hin isyu ha mental health.
