TACLOBAN CITY – Ginlalauman nga magtitikang na an pag-umento han mga papliton ha downtown area han syudad han Tacloban mahuman nga magpatuman an bigtime oil price hike.
Ini an sumala kan Barangay 41, Tacloban City Chairman ngan Tacloban-Filipino Chinese Chamber of Commerce and Industry Information Officer, Hon. Colai Go.
Dugang pa hini, ha iya paglibot in napansin niya nga pira nga gasolinahan an halaba an pila ngan pira naman an haros tawo, ngan ini in mahitungod nga nag-una na pagpatuman hin umento ha presyo an pira nga gasolinahan, samtang an iba naman nga ginsusurong in nagpabilin an presyo.
Igindidire la anay gihapon an pagpalit han produkto nga lana hin tagpira ka-jug mahitungod nga prayoridad nga makapalit anay adton mga nagamit ha pan adlaw-adlaw o adton mga sarakyan sugad han jeepneys, multicabs, motorsiklo, ngan pribado nga sarakyan.
Ginmalatumat gihapon ni Go nga mayda haligot ngan panmaihaan nga epekto ha ekonomiya han nasud, partikular na ha syudad han Tacloban, an kasamok ha Middle East.
An short-term effect hini in an tigdaay nga pagsaka han presyo han mga produkto nga lana, samtang an long-term effect naman in posible maapektaran an panwelduhan ha mga trabaho sugadman in posible gihapon nga mag-iban hin empleyado labi na kun igpatuman an 4-day work week.
Samtang, ginlalauman naman an hinay-hinay nga pag-umento ha mga presyo han paliton labi na han dry ngan wet goods ha syudad han Tacloban, nga makakapahitaas han inflation.
