TACLOBAN CITY – Ginlalauman an paghitaas an presyo han pira nga mga papliton ha nasud ha masunod nga bulan han Mayo.
Una hini, ginpahayag ni Philippine Amalgamated Supermarkets Association President Stephen Cua nga napulo na nga mga kompanya an nag-abiso nga maghihitaas hin presyo han ira mga produkto sugad han sabon, shampoo, kape, instant noodles, delata ngan gatas.
Sumala naman kan Eugene Tan, Presidente han Philippine Chamber of Commerce & Industry Tacloban, Leyte chapter, tikang pa man han bulan han Marso in nagkaada na hin pag umento han presyo han pira nga mga papliton.
An rason hini in tungod ha padayon nga oil price hike nga nagdudurot han paghitaas han fuel or transportation cost, labor cost ngan paghitaas han presyo han mga raw materials han magkadirudilain nga mga produkto.
Nagtutuo gihapon hi Tan nga posible nga magpadayon pa an mao nga pag-umento samtang dire pa nag-sstabilize an presyo han produktong petrolyo.
