NATIONAL – Gin pirmahan ni Presidente Ferdinand Marcos Jr. an Republic Act No. 12145 nga nagrere-organisa ha National Economic and Development Authority (NEDA) kumo Department of Economy Planning and Development (DEPDev).
An DEPDev in magigin pangunahon nga ahensya han gobyerno ha pagpaplano, paghihimo han polisiya, ngan pagbabantay han mga programa nga pagpa-ursa. Panuyo hine nga siguraduhon an koordinado ngan episyente nga paggamit han mga karikuhan han nasud ngan gobyerno.
Magtutudlok gihapon ine hin long-term vision ngan 25 katuig nga development framework para ha sustenable nga pag-ursa han nasud. An sekretarya han Department of Economy, Planning, and Development (DEPDev), kumo chief economist, an maghahatag hin sagdon ha Presidente ngan Gabinete kasumpay ha ekonomiya.
Magpapabilin naman nga kasugbong han Department of Economy, Planning, and Development (DEPDev) an mga dati nga attached agencies han National Economic and Development Authority (NEDA) sugad han Philippine Institute for Development Studies ngan Public-Private Partnership Center. Magkakamay-ada gihapon ine hin regional offices ha bug-os nga nasud, labot la han NCR ngan BARMM.
Gin papakusog gihapon han balaod an sumpayan han planning ngan budgeting pinaagi han gintatawag nga Planning Call, nga may panuyo nga himuon nga mas epektibo ngan transparent an paggamit han pondo han nasud.
An National Economic and Development Authority Board in re-reorganisahon kumo Economy and Development Council nga pagmamanguluhan han Presidente. Magigin epektibo an balaod 15 kaadlaw mahuman nga maipublisar.
