TACLOBAN CITY — Utro nga nagpahimatngun an Professional Regulatory Commission (PRC) Regional Office 8 ha mga mapakadto ha ira buhatan agud nga malikayan na naman an halaba ngan saramok nga pila.
Sumala kan Narcival Randy Taquiqui, regional director han PRC RO8, ginhahangyo nira ha mga aplikante nga diri la anay pumakadto ha opisina kun diri pa schedule han ira appointment tungod an mga ini in diri la gihapon matatagad ngan mas makakadugang la pagdurumog han katawhan ha PRC.
Ginhangyo pa gihapon han mao nga opisyal ha mga professionals nga magpaka propesyunal ngan diri maglabog ngan magsarang han ira mga basura ha buhatan han PRC ngan sumunod ha mga pila.
Dugang hini nga ginbubuhat han mga empleyado han PRC an ngatanan agud nga maserbisyohan an mga napakadto nga mga aplikante pero danay daw in diri nira nakaakos nga uboson ka serbisyohe an ngatanan ha usa la ka adlaw tungod nga kulang gihapon hira hin tawo.
Manunumduman nga gin-uran hin reklamo an regional office han PRC tungod han lurubo nga aplikante ngan halaba ngan masamok nga pila ha pag-ariglar han mga lisensya tungod nagkadudrungan an mga pumakadto tungod han 2 ka adlaw nga waray opisina may hiunong han bagyong Usman.
