TACLOBAN CITY – Nakatalaan na nga pagtikangan an kontraksyon han ika duha nga San Juanico Bridge nga magdudugtong han Samar Islands ngan Leyte Islands sunod nga tuig 2025 signgon han Department of Public Works and Highways Region 8.
Iginpasabot pa hini nga magbabag-o an magigin lokasyon han tulay tungod han mga magkaudurudilain naman nga mga rason nga kinahanglanon nira tagan hin konsiderasyon.
Nakaplano manggud nga titindugon an tulay ha may Babatngon, Leyte tipakadto ha Sta. Rita, Samar, in igbubutang na ini pira kametros la itun distansya tikang naman han makasaysayan nga San Juanico Bridge.
Signgon han ahensya, nga kun magsapit daw an duha nga tulay, in magkakaada hin duha nga aragian mahitungod nga an usa in an tipakadto ha Samar ngan an usa naman in aagian tipakadi naman ha Leyte.
Ira daw gihapon ginkonsidera an magigin maintenance hini nga posible makadugang pa han gastos ha pagtitindog hin station in labi na nga mayda na nira nakatindog ha may San Juanico Bridge.
Pagdugang pa hini nga maupay daw liwat nga igsapit an mga tulay kay harapit daw la Tacloban City nga amo naman an ginkokonsidera nga regional capital han rehiyon.
Kun mahihinumduman gihapon in iginduso han mga opisyales ha rehiyon an paghimo han ika duha nga tulay mahitungod naman han kabutangan han San Juanico Bridge ngan dako daw nga duro an gastas ha pagmimintinar nga gintukod pa tikang dida han 1973.
Sobra usa na ka tuig nga nagdudumara hin feasibility study an Japan International Cooperation Agency (JICA) para hini nga plano, pero yana nagbag-o an desisyon.
