NATIONAL – Ha opisyal nga pag-aabri han 20th Congress ha Hulyo 28, maghuhurar o mapili an 24 nga mga senador hin bag-o nga malingkod nga Senate President.
Tulo nga ngaran an matunog ha pagka-Presidente han Senado—ginkakalakipan nira Senador Francis “Chiz” Escudero nga presente nga Senate President; Vicente “Tito” Sotto III nga anay na nga nagserbi kumo Senate President dida han 2018 kutob 2022; an reelectionist nga hi Imee Marcos nga iginduduso nga dumalagan pagka-Senate President.
Kadugan han mga ine, mayda pira nga senador na gihapon an nagpahayag han ira susuportahan nga malingkod nga Senate President.
Ha usa nga interview kan Senador Alan Peter Cayetano, ginmalatumat hine nga kun yana an magigin piniliay, sigurado nga daog na hi Escudero kumo presidente han Senado ha 20th Congress.
Gibuyagyag hine nga mayda suporta hi Escudero tikang ha sobra 13 nga mga senador o majority votes.
Natuod naman hi Senador Joel Villanueva nga magpapabilin la gihapon hi Escudero kumo Senate President ha 20th Congress.
Dugang pa hine, maabot ha 13 an ihap han mga senador nga mabutos kan Escudero ha pgka-Senate President.
Waray naman daw ginpapalibot nga resolusyon para pumirma an mga senador han suporta pero nagiiru-istorya hira nga mga magbabalaod.
